Новиот сопственик на Твитер, Илон Маск, на својот профил на социјалната мрежа објави анкета за тоа дали да го врати профилот на поранешниот американски претседател Доналд Трамп.
Профилот на Трамп беше блокиран од социјалните мрежи по настаните од 6 јануари 2021 година, кога неговите поддржувачи упаднаа во Капитол во обид да го попречат одобрувањето на Конгресот за победата на претседателските избори на демократот Џо Бајден.
„Да го вратиме поранешниот претседател Трамп“, праша Маск, додавајќи два одговори со да или не.
Гласањето ќе трае 24 часа. Во моментов 61 отсто се за враќање на профилот на политичарот, а 39 отсто гласале против.
Во коментарите, претприемачот напиша „Vox Populi, Vox Dei“ („гласот на народот е гласот на Бога“ – лат.).
Претходно Маск на Твитер напиша дека раководството на американската компанија се уште не одлучило да го врати профилот на Доналд Трамп.
На 27 октомври Маск склучи договор за купување на Твитер вреден 44 милијарди долари.
