72-от избор за Мис на САД се одржа во луксузното одморалиште Гранд Сиера во Рено, Невада. Ноелија Војгт од Јута ја освои титулата Мис на САД за 2023 година. Второто место го зазеде Савана Ганкевич, а третото Алексис Луманс, објави прес-службата на изборот за Мис на САД.
Војгт (23) победи 50 други натпреварувачки во конкуренцијата. Во финалето на натпреварот учествуваа само пет девојки – Војгт од Јута, Ганкевич од Хаваи, Јасмин Даниелс од Пенсилванија, Лувија Алзате од Тексас и Алексис Луманс од Висконсин. Традиционално, натпреварувачките продефилираа во костими за капење и вечерни фустани.
На прашањето со што ќе придонесе како Мис на САД во последниот круг прашања и одговори, Војгт изјави дека е „двојазична Венецуелка-Американка“ и вети дека ќе се поврзе со различни заедници низ Соединетите држави.
Целта на натпреварот не беше само да се одреди најубавата девојка во Соединетите Американски Држави за 2023 година, туку и да се понуди „модерна и прогресивна слика за 70-годишната традиција“, рече претседателката и извршна директорка на организацијата Мис САД, Лејла Роуз. .
