На 1-ви септември во еден од најубавите градови во нашата земја ќе се одржи можеби досега најголемиот фолк-спектакл со најпознатите македонски фолк-ѕвезди.
Концертот е закажан на ракометното игралиште во Битола, а публиката ќе ужива во најголемите хитови во изведба на популарната Сузана Гавазова, Анета и групата Молика, Марјан Коцев, Стојне Николова, Благоја Грујовски, Ирена Спасовска, Дамјан Стојановски, Рамко Беслими, Ален Хасановиќ, Каан Мазахр и Зуица Лазова.
Познатата пејачка Стојне Николова вели дека ова ќе биде концерт кој долго ќе се памети.
– Среќна сум што сцената ќе ја делам со едни од најквалитетните музичари во нашата земја, бидејќи се работи за мои колеги кои имаат големи кариери. Ги поканувам сите битолчани, но и од околните градови да дојдат и да уживаат во звуците на народната музика. Од мое име и од името на сите што ќе настапуваме, им ветуваме одлична забава – вели популарната Стојне Николова.
Исто така и Благоја Грујовски не го криеше задоволството што ќе настапува пред битолската публика, но упати и предизвик до публиката.
– Дојдете да покажеме дека слушаме македонска народна музика, дојдете да покажеме дека го цениме нашето – накусо изјави популарниот пејач.
Инаку станува збор за голем концерт со мултиетнички карактер, каде покрај многуте македонски фолк-ѕвезди ќе можеме да видиме изведувачи од другите етнички заеднци, како што се Ромите, Турците и Бошнаците. Она што е важно да се напомене, а тоа е дека познатите изведувачи ќе имаат прилика да пеат на најсовремена опрема, голема бина и одлично осветлување, нешто што ретко се гледа кога станува збор за фолк-музиката.
Концертот ќе биде организиран според сите мерки за заштита од коронавирусот!
