Денес ве запознаваме со крушевчанката Кики, домаќинка, и нејзините убавици кои красат стотина квадратни метри во Битола. Кики веќе три години одгледува различни видови цвеќиња, внатрешни и надворешни, но досетливо вели дека – токму цвеќињата ја одгледуваат неа.
– За уредувањето на тревникот и зимзелените дрвца се грижи мојот сопруг. За да е сè расцветано и зелено, потребна е посветеност, работа и секако, многу љубов – искрена е Кики.
Вели дека, како домаќинка, таа има време на претек, па секое утро го посетува секое цвеќе, посебно, му се восхитува на неговата убавина, му се насмевнува, му пее.. и затоа, и тие ѝ возвраќаат со иста љубов која се претставува преку миризливите цветови.
– Еве, и во оваа доцна есен, сè уште сите цвеќиња ми надвор, но под стреа. А дел од нив, гледате, сè уште се расцветани – весело ни покажува нашата цветна дама и дообјаснува:
Љубичиците, хризантемите, трендафилите остануваат надвор и преку зимата, не мрзнат. Во земја остануваат зумбулите, криновите, нарцисите, кокичињата, зaшто тие имаат компирче кое не мрзне. Напролет многу ме радува погледот на првите мои љубовчиња.
А кој може да и одолее пак, на убавината од кактуси, кои Кики ги има во значителен број.
– Кактусите од рана пролет ги вадам надвор, а ги прибирам пред да падне температурата до минус. Иако имаат остри иглички, многу се убави кога ќе расцветаат – нè уверува таа.
Уживајќи низ дворската прошетка, доаѓаме до зимските кралици. Може да си замислите каква бајка изникнува токму оттука за време на новогодишните и божиќните празници. Каква магија!
– Посебно е волшебна елката која секоја Нова година ја украсуваме со сијалички и изгледа навистина како во приказна! А ова тука, дрвово без лисја е смоква која нè засладува во текот на лето – ни покажува Кики.
– За љубителите на цвеќе им препорачувам доколку имаат желба, љубов, а секако и простор, да си почнат со првите пролетни цвеќиња кои не мрзнат, остануваат во земја преку зимата, крин, зумбул нарцис, кокиче… – советува таа.
Инаку, Кики е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА:
