Хрватската музичка ѕвезда Нина Бадриќ, пред својот трет последователен концерт во белградскиот „Сава Центар“, отворено проговори за својата долгогодишна кариера, за преполните сали, но и за тешкиот пат до успехот кој го изодела без скандали.
Нина истакна дека подготовките за концертите се готови и дека е пресреќна што биле распродадени во рекордно време. Сепак, таа се осврна и на тоа колку е тешко за една жена достоинствено да опстане на сцената.
„Многу е тешко, ова дефинитивно не е работа за слаби луѓе. Патот е за силните борци. Јас не сум личност склона кон скандали, кавги или мешање во туѓи животи. Првенствено барам мирен живот и така ги градев односите и со колегите и со медиумите сите овие години. Тоа не значи дека некој може да ме гази – знам многу добро да се одбранам и да барам правда, но не ми требаат валкани приказни за да бидам популарна“, изјави пејачката.
Таа додаде дека патот на една самостојна жена во музичката индустрија е полн со предизвици.
„Тешко е да се градиш на сцената како жена. Особено ако немате менаџер, богати родители или моќни и влијателни љубовници. Ако како млада девојка влегувате во ова сами и така создавате кариера, нормално е дека е тешко да одиш низ животот без заштита. За мене е важен начинот на кој се доаѓа до целта, а не само самата цел. Тоа ни ги чува срцето и душата“, заклучи Бадриќ.
Нина го коментираше и успехот на младиот Јаков Јозиновиќ, кој успеа да ги наполни големите арени без ниту една своја песна, истакнувајќи дека тој е доказ оти младоста е мудра и дека успеал да ги врати квалитетните песни на сцената во време кога доминира „треп“ музиката.
