Сезоната на зимници е во тек. А на наше задоволство и чест, страничките на еспресо.мк ги разубавува и популарниот шеф Бранко Попоски, познат под псевдонимот „Готвиме со Бранко“ („Cooking with Branko“).
Овој врвен готвач, гастроном и љубител на кулинарството денес ни предлага да си подговиме највкусен домашен ајвар по рецепт на баба.
– Омилена зимница во сечиј дом е домашниот ајвар, посебно кога е приготвен по рецепт на баба. Без сомнение, ќе ве израдува со неговиот вкус, а посебно во комбинација со овчо сирење и маслинки, препорачува шеф Бранко.
Потребни состојки:
- 8 килограми црвени пиперки
- 3 големи модри патлиџани
- 380 милилитри масло
- 1 голема лажица шеќер
- Сол (по вкус)
Начин на подготовка:
Испечете ги пиперките, внимавајте да не ги изгорите, па потоа излупете им ја кората и исчистете ги семките (за побрзо да се лупат, ставете ги после печење во најлонска кеса). Откако ќе ги излупите, оставете ги да се оладат, а потоа ставете ги на цедилка околу час , два со цел убаво да се исцеди водата од нив.
Додека се цедат пиперките, испечете ги и модрите патлиџаните, па излупете ги и нив и исцедете ги. Потоа, ставете ги пиперките и модрите патлиџаните во апарат за мелење месо или пак специјална мелница за пиперки, и добиената смеса ставете ја во голем лонец или народски кажано шерпа. Почнете полека да варите.
Смесата мешајте ја што повеќе со дрвена лажица, а за време на варењето постепено додавајте масло, по 80 милилитри на секои 20 минути. Додека се подготвува ајварот, мешајте убаво и внимавајте маслото да не излезе на површина. На околу 20-тина минути пред крајот од варењето, додајте ја и солта и шеќерот. Доколку сакате да знаете дали ајварот е готов, поминете со лажица по дното – ако таа остава зад себе траги во која можете да го видите самото дно, тогаш ајварот е готов.
Теглите убаво измијте ги и ставете ги во печна на 50 степени. Полека почнете да полните додека се топли.
Откако ќе ги наполните, на врвот од секоја тегла додајте малку масло и добро затворете ги со капак. Држете ги сите на едно место, прекриени со крпа. Откако ќе помине еден ден, однесете ги на ладно и темно место.
ФОТО- ПРИВАТНА АРХИВА
