Во услови кога Скопје се гуши од загадениот воздух, и кога градските власти постојано апелираат да се користи јавен превоз, со цел намалување на загадувањето, сосема оправдано е граѓаните да очекуваат пристојни услови за превезување, особено што јавниот градски превоз е единствената алтернатива што се нуди за движење низ Скопје во замена за автомобилите.
Сепак, голем број граѓани изминатиов период на социјалните мрежи искажуваа незадоволство од хигиената во автобусите.
– И покрај тоа што ЈСП Скопје има перални во автобазите во Ѓорче Петров и во Автокоманда, автобусите се нечисти – вели читателка на Слободен печат.
– Однадвор изгледа како на нив да се залепила цела прашина од скопските улици, а во голем број од автобусите, прозорите и вратите се толку нечисти што не можам да видам на која автобуска станица се наоѓам – вели друг читател и корисник на јавен градски превоз.
Фоторепортерот на „Слободен печат“ минатата недела излезе на скопските улици, а фотографиите кои што ги направи се потврда за кажаното на социјалните мрежи.
Ги прашавме и граѓаните кои редовно се возат во автобусите на ЈСП дали имаат забелешки на хигиената во автобусите. Дел од нив потврдуваат дека автобусите се нечисти, други пак велат дека немаат големи очекувања и дека се прилагодуваат на условите.
По критиките на дел од граѓаните, реагиравме до ЈСП Скопје, по што денеска, откако повторно излеговме на скопските улици, забележавме значително подобрена хигиенска состојба.
The post Од рекламите и валканите прозори, патниците во автобусите на ЈСП не знаат каде да се симнат (ФОТО+ВИДЕО) appeared first on Слободен печат.
