Совршено изработуваат јакни, палта, џемперчиња, блузички, фармерчиња, фустанчиња, здолништа, тренерки, градници, околувратници, поводници, капчиња, костуми за свечености и свадби, шалчиња, марами, чизмички, гаќички за циклус…, поточно совршено ги дотеруваат домашните миленичиња.
Што препорачувате за дождливото време, кое е проблем за секој сопственик на кученце кое мора да се прошета?
– Свесни сме дека ова е еден од најголемите проблеми на сопствениците. Никој не сака да го изложи миленикот на настинки и болести од водата што ќе му се впие во крзното на ниските температури, затоа изработуваме мантили за заштита од дожд. Секој мантил е изработен со можност за регулирање на обемот, со цел да може под него да се облече и подебело парче облека доколку е потребно, или пак доколку има промена во килажата. Потоа, се работи на специјален начин, кој ќе заштити од пролевање на вода по телото, по предните и задни нозе. Се изработува од 100 отсто водоотпорни материјали, плус топол и пријатен материјал од другата страна, со цел да му е пријатно на миленикот, но исто така и да може да се користи како ветровка при потопли временски услови, а да биде соодветна заштита на миленикот од ветерот. Изработуваме и други модели, еден од нив е моделот што е погоден за пониските миленици, кој го заштитува делот на стомачето од прскање.
Претпразнична сезона е, божиќните џемперчиња се многу модерни, какви модели нудите?
– Најсоодветен одговор на ова прашање е – секакви! Сè што имаат замислено сопствениците на домашни миленичиња, може да се изработи и да се направи. Единствениот проблем е времето, зашто за овие модели е потребно повеќе време и внимание, ова се најкомплексните модели за изработка што бараат многу напор и многу концентрација. Џемперчињата на пример, можат да бидат со новогодишни односно со божиќни тематски апликации, од снегулки, елки, ирваси, ангелчиња, до Дедо Мраз. Подеднакво, нудиме и можност за „пишување“ на порака на самиот модел, по барање на клиентите. Покрај божиќни џемперчиња, изработуваме и новогодишни и божиќни блузички, коишто се од топли и пријатни материјали, а воедно и ги испорачуваме за многу пократок временски период.
