Хрватската музичка дива Тереза Кесовија (87) се повлекува од сцената по повеќе од 60 години богата кариера. Големиот проштален концерт кој е веќе распродаден, ќе се одржи во недела, на 3 мај во Сплит.
Пејачката го најави повлекувањето поради здравствени причини, но истакнува дека гласот сè уште добро ја служи.
– Одамна сум во пензија, не можам повеќе да пеам како порано. Имав операции на колената, кои и понатаму ме болат, како и ‘рбетот. Сето тоа е тешко, но собирам сила и пеам. Тоа ми е најлесно. Гласот ме служи, само морам да внимавам и понекогаш да седам. На публиката не ѝ е важно дали стојам или седам, важно им е да ме слушнат – изјави таа.
Кесовија зад себе има години на турбулентен живот, исполнет со љубовни успеси, но и со болка. Нејзиниот најголем успех е синот Алан, кого го доби во бракот со Миро Унгар, југословенски пејач на шлагери и забавна поп-музика. Парот бил во брак цела деценија, по што и двајцата ја побарале љубовната среќа со други партнери…
Тереза и Миро Унгар се запознале случајно, откако тој се вратил од странство. Миро првпат ја видел во 1961 година во салата „Истра“.
— Сакав да видам што нуди домашната сцена. Без многу размислување отидов на концерт, а на сцена излезе една млада дама која пееше посебно, поинаку. За мене тоа беше релативно старомодно. Пееше некоја канцона, но милозвучно, убаво, пријатно за слушање — ми се допадна, иако беше различно од музиката што јас ја сакав и ја слушав… — раскажал Миро во една прилика.
— Јас сакав модерни песни од тоа време, џез, а нејзиното пеење немаше допирни точки со џезот. Сепак, таа на некој начин ме маѓепса со тоа пеење. Отидов во гардеробата за да се запознаам со неа — изјавил Миро за „Вечерњи лист“.
Романсата брзо започнала, а се венчале веќе следната година. Една година подоцна го добиле синот Алан. Семејството извесно време живеело во Париз, а по разводот во 1973 година се вратиле во Загреб.
— Се вратив за да бидам поблиску до синот, иако тој беше со мајка му. Кога нашиот дом се распадна, веќе немав мотив да останам во Франција — изјавил Миро во една прилика.
Тереза подоцна се омажила за ватерполистот Роналд Лопатни, а Миро се женел вкупно четири пати. Денес е во среќен брак со Сара Унгар, која е од него помлада 42 години.
Поранешниот брачен пар денес е во одлични односи.
Тереза во 2014 година се бореше за живот кога беше хоспитализирана поради сепса, а голема поддршка ѝ бил Миро.
— Тереза е борец и нема да се предаде. Таа во животот сè има пребродено и секогаш се извлекла — изјави тогаш Миро Унгар, а таа навистина излезе од таа битка како победник.
„Моето животно мото е: никогаш не се предавај, секогаш остани иста – остани своја. Едноставно, никогаш не дозволив животот да ме скрши. Пред ништо не сум клекнала.
Во животот, а особено во јавниот живот, покрај талентот кој е основа, мора да имате храброст и верба во она што го работите. Знам дека она што го правам е добро и во тоа секогаш давам сè од себе. А публиката тоа го препознава.
Кога постојат взаемна љубов и почит, тогаш нема потреба да размислувате за комерцијални трендови по принципот „по секоја цена“. Ако сакате да траете на сцената, тогаш нема такви калкулации.
Песната и интерпретацијата мора да траат, да бидат препознатливи и единствени – изјави Кесовија за Тпортал.
View this post on Instagram
