Со тажна порака се огласи Горан Тонев, музичарот кој го преживеа трагичниот пожар во Кочани кој се случи на 16 март во дискотеката „Пулс“. Од целиот бенд на сцената таа кобна вечер, се спасија тој и Ана Костадиновска, која пееше придружни вокали.
Гитаристот Тонев кој е од Штип, се лекуваше во болница во Солун, а на домашно лекување беше пуштен во мај, два месеци по пожарот.
Во септември, шест месеци по трагедијата, тој на својот Инстаграм профил, објави стори посветено на своите колеги од бендот.
-Поминаа 6 месеци од ноќта која што на сите ни ги промени животите… Уживавме да ја делиме сцената, насмеани и ведри како и секој наш настап, но таа вечер имаше посебна енергија како да чувствувавме дека е за последен пат.
Не требаше да биде вака колеги мои… Засекогаш ќе ве носам во моето срце! Почивајте во мир“, напиша Горан тогаш.
Денес беше погребан Владимир Блажев- Панчо, кој по седум месеци поминати во болница почина на 14 октомври. Панчо беше испратен во вечноста токму на денот кога пред 18 години загина Тоше Проески.
Тонев ја сподели снимката од Сара Пројковска, придружниот вокал на „ДНК“ и Панчо како ја пеат песната „Немир“ од Тоше Проески и Каролина Гочева во автомобил, додека се враќале од настап.
-Сара и Панчо за Тоше. Овој 16 октомври боли повеќе од било кога- денот кога го изгубивме Тоше, а денес се простуваме од Панчо“, напишал гитаристот.
