Условите на Црвената планета се навистина сурови, а исклучок не е ниту земјиштето на неа. Почвата не само што е посна и без органска материја и корисни микроорганизми, туку е и многу заситена со соли и минерали непогодни за повеќето растенија на Земјата. Меѓутоа, ново научно истражување предлага решение – луцерка.
Способна не само да преживее, туку и да се развива во вулканска почва со сличен состав на онаа што го покрива Марс, научниците веруваат дека таа може да претставува исклучително добра основа како почетна култура, пренесува Sajns Alrt.
Со текот на времето, луцерката би ја подобрила почвата на плантажите каде што се одгледува, а нејзините остатоци освен за храна би можеле да се користат и за ѓубрење и дополнително збогатување на почвата каде подоцна би можелo да се одгледуваат репка, ротквици и зелена салата.
„Поради ниската содржина на хранливи материи во почвата на Марс и високиот салинитет на водата, културите не би можеле да се одгледуваат. Затоа, од суштинско значење е да се зголемат хранливите материи во почвата и да се намали салинитетот на долг рок“, се наведува во новата студија објавена во списанието Plos One.
Претходните истражувања покажаа дека дури и оние екстремно издржливи растителни култури од Земјата не можат успешно да се одгледуваат без да се донесат и додадат ѓубрива во почвата во која би растеле. Тука стапува на сцена луцерката. Експертите утврдиле дека тоа растение може да расте во реголитот на Марс без додавање ѓубрива.
Тестирано е и како би се однесувал симулираниот реголит од Марс доколку се наѓубри со луцерка. Репката, ротквиците и зелената салата – три билки кои бараат малку одржување, брзо растат и не им е потребно многу вода – успешно се одгледани во него.
Има само еден услов – потребна е свежа, слатка вода. Врз основа на понатамошни експерименти, научниот тим смета дека солената вода од Марс би можела да се третира со бактерии, а потоа да се филтрира низ вулканскат карпа за да се добие свежа, слатка вода потребна за одгледување.
„За прв пат е осмислено интегрирано користење на биоѓубрива и микроорганизми за обработка на базалтниот реголит и солената вода за да се создадат ресурси за одржливо одгледување растенија“, велат истражувачите.
Одгледувањето луцерка на Марс и нејзиното користење за збогатување на почвата би решило многу од логистичките проблеми за транспорт на огромни количини ѓубрива и храна милиони километри до Марс.
