Американскиот рапер Кулио, познат пред се по песната „Gangsta’s Paradise“ од 1995 година, една од најпознатите во историјата на хип хопот, почина на 59-годишна возраст.
ТМЗ напиша дека раперот бил пронајден мртов во куќата на пријател во Лос Анџелес во средата. Засега не се познати причините: според она што го кажал неговиот менаџер, постои сомневање дека починал од срцев удар.
Кулио, чие вистинско име беше Артис Леон Ајви Џуниор, е роден на 1 август 1963 година во Пенсилванија и израснал во Комптон, во близина на Лос Анџелес. Почна да рапува кон крајот на 1980-тите и го издаде својот прв албум, It Takes a Thief, во 1994 година. Сепак, следната година постигна светски успех благодарение на „Gangsta’s Paradise“. Во 1996 година, песната му донесе на Кулио Греми за најдобра соло рап изведба.
Во следните години Кулио продолжи да објавува дискови и во исто време почна да се посветува на телевизиската кариера. Глумеше и во неколку филмови, во повеќе случаи глумејќи се себеси. Во својата кариера продаде над 17 милиони плочи.
