Српскиот пар Лазар Ристовски и Аница Лазиќ, кои често се тема во медиумите поради нивната разлика во години – актерот е постар 39 години од својата партнерка, во моментов ужива на патување во Милано, Италија.
Лазиќ објави фотографии од престолнината на модата, со кои покажа како ужива со својот сакан – посетиле прекрасни локации, вкусиле од неодоливата италијанска кујна и се почестиле по некое модно парче од „Шанел“.
„Милано, совршен си“, напиша актерката во описот на фотографиите, не можејќи да го сокрие своето воодушевување.
Да потсетиме, Ристовски и Лазиќ јавно открија дека се во романтична врска кон крајот на 2023 година. Оттогаш се постојано заедно – од настани и филмски премиери, до најразлични патувања ширум светот.
Во една прилика, актерката откри дека нивната конекција била инстантна.
„Лазар и јас се запознавме без каков било посредник, единствениот посредник беше Бог. Се сретнавме во Белград, се погледнавме неколку секунди, а потоа се прегрнавме. По таа прегратка седнавме и разговаравме со часови. Кога ме прашуваат од кога сме заедно, јас велам – од првиот момент кога се погледнавме. Разговаравме и за тоа дали треба да излеземе во јавност и да кажеме дека сме заедно. Се договоривме дека ние треба да ја соопштиме веста, а Лазар не би бил Лазар ако тоа не го направеше на свој начин“, изјави таа за телевизија Прва.
„Едно утро објави дека сме заедно додека јас спиев и замина на работа. Станав малку подоцна, не го вклучив веднаш телефонот и ме пречека море од пораки – тогаш воопшто не ми беше смешно. Потоа ги видов насловите што излегуваат и ден-денес. Доживеав интернет-насилство. Имав помош од психотерапевт, а Лазар ми беше голема поддршка. Во тие моменти се прашував како им е на некои деца“, додаде Лазиќ.
Ристовски претходно беше во брак со сопругата Даница, со која се раздели по 42 години брак. Тие се венчаа во 1980 година и имаат два сина – Петар, кој е филмски режисер, и Јован, кој е економист.
