Илина Арсова, која веќе три години живее во Америка, и е на докторски студии на Универзитетот Тенеси во САД каде што и предава, се врати во Македонија.
Нашата позната планинарка и уметница која има освоено многу врвови, го освои и срцето на познатиот актер и шоумен Игор Џамбазов, но таа љубов поради далечината меѓу нив заврши.
Илина изминативе денови објавуваше фотографии и видеа од нејзиниот омилен Лагадин во Охрид каде што има куќа, а меѓу нив се и видеата како вежба.
Но, една непријатна случка доживеала нашата позната планинарка на Шара, која целосно ја раскажа на својот фејсбук-профил.
„Минатиов викенд бевме на Шара каде учествував во планинскиот настан Прошарај по Шара организиран од ентузијазмот и љубовта кон планината на @sharam_mk & @sannnnnnnnm. Имав можност да се сретнам и дружам со прекрасни луѓе, и да се претставам со мала ликовна изложба: Патеписи инспирирани од планините… Не само од убавиот пејзаж туку и од загадувањето и уништувањето на истите од страна на човекот.
Сепак, како најубав момент ќе ја издвојам дружбата со моите родители и мили пријатели Влатко, Ива, Јана и прошетката до врвот Лима. Имено, моите родители се мојата врска со Шара бидејќи на само две-три годишна возраст тие нè носеле сестра ми и мене на скијање на Шапка.
Е сега, имаше и разочарувања. Кога стигнавме до местото за одмор таму пристапи џип со уште неколку луѓе. Додека тие се фотографираа и правеа пикник, возилото беше оставено запалено со што предизвикуваше и воздушно и звучно загадување. Ги замолив да го изгасат моторот, тие се зачудија и дрско прашаа зошто тоа ни смета. По кратки преговори, го изгаснаа моторот од возилото, за што им благодарам.
Огромно разочарување беше да ја видам планината покриена во лузни. Развојот на туризмот и активности ДОЗВОЛЕНИ ВО НАЦИОНАЛЕН ПАРК е строго одговорна задача. Ратраците во зима направиле подлога за дивеење на 4х4 возила во лето кои само ги продлабочуваат и прошируваат овие неповратни лузни на планината. Додека пак, зголемената конструкција на објекти, џамии и што уште не, неповратно ја деградираат естетската вредност на пејзажот.
Луѓето не се свесни дали некому му го нарушуваат мирот со нивното присуство и одлуки да прават што ним им одговара. Не само што денешниот човек е игнорантен кон живиот свет и биодиверзитет, но и кон другите луѓе околу себе, а тој недостиг на солидарност води кон распад и разор во нашето мултиетничко општество. Природата нема ниту религиска ниту политичка припадност и сите заедно треба да се грижиме за неа.
Сметам дека и ваквите настани треба да се исклучително добро осмислени, за да едуцираат кон зачувување на природата, без да придонесат кон нејзино загадување. Поздрав до волонтерите кои чистеа отпад, работилницата за рециклирање и сите прекрасни ракотворби на базарот“, раскажа Арсова.
