Актерката Џејми Ли Кертис зборуваше за опасностите од пластичната хирургија, како и за наметнатите идеали за убавина. 62-годишната актерка не само што сведочела за тоа преку социјалните мрежи, туку и го почувствувала на своја кожа, пренесува „Fast Company“.
„Денешниот тренд со филери, операции и опсесија со филтрирање фотографии, се што правиме за да го прилагодиме изгледот на Зум, едноставно брише генерации и генерации убавина“, рече таа и продолжи, „Откако ќе направите нешто на лицето, не можете да го поправите. Пробав пластична хирургија и не ми помогна. Поради неа, станав зависна од апчиња Викодин. Сега сум чиста полни 22 години“.
View this post on Instagram
Џејми неодамна зборуваше за зависноста од алкохол и апчиња, кои почнала да ги пие по операцијата на очите.
„Имам природно отечени очи. Ако ги погледнете моите фотографии од детството, изгледам како да не сум спиела. Отсекогаш сум била таква. Ја снимивме сцената во судницата, со високо поставено флуоресцентно осветлување. Зачекорив на сетот и камерманот рече: „Денес не ја снимам. Очите ѝ се премногу подуени“. Бев преплашена и толку засрамена што по снимањето отидов на рутинска операција за отстранување на вреќичките“, објасни актерката и додаде дека била и на ботокс и на липосукција, но дека ништо не ѝ помогнало.
