Повеќе од десет години по нејзиното објавување, песната „Убава“ на музичкото дуо „Ај Кју“ конечно доби официјален видеозапис.
Станува збор за песната со која Марија и Бојан победија на Скопскиот фестивал во 2015 година, а која со текот на времето стана една од нивните најпрепознатливи љубовни балади.
Иако досега немаше спот, „Убава“ си го најде патот до публиката и стана чест избор за првиот свадбен танц на многу младенци.
Инспирирани токму од таа симболика, Марија и Бојан одлучија видеозаписот да го создадат од најемотивните моменти од нивната свадба, која неодамна се одржа на плажа во Грција, во хотелот „Ал Маре“.
За видеозаписот е заслужен Марио Блажевски од „Студио Белмондо“, кој низ автентични кадри ја пренесе љубовната приказна што стои зад песната и ѝ подари визуелно издание по повеќе од една деценија од нејзиното создавање.
