По смртта на легендарниот пејач Халид Бешлиќ, неговите колеги и пријатели се простуваат со трогателни зборови.
Една од првите што му оддаде почит беше пејачката Марија Шерифовиќ, која објави емотивна порака во негова чест.
„Престана да чука музичкото срце на Босна и Херцеговина. Халиде, нека ти е вечна слава и благодарам за секоја скршена чаша и пуштена солза“, напиша Шерифовиќ под фотографија од пејачот, додека во позадина свиреше неговата безвременска песна „Ја без тебе не могу да живим“.
Таа во пораката упати и искрено сочувство до неговото семејство.
Од Бешлиќ се простија и бројни други музички колеги и пријатели, кои споделија спомени и зборови на почит за човекот чиј глас ја обележа балканската естрада.
Според пишувањата на медиумите, последните недели од животот Бешлиќ ги поминал во Клиничкиот центар во Сараево, на Одделот за нефрологија. Поради здравствени проблеми, крајот на август го откажа концертот во Градачац, по што започнал рехабилитација. Подоцна бил префрлен на Одделот за онкологија поради проблеми со црниот дроб.
Во средината на септември, неговиот менаџер Дамир Рамљак изјави дека состојбата на пејачот се подобрила и дека сите се надевале на негово закрепнување.
„Оди на подобро, има надеж, добро реагира на терапијата. Докторите дури планираа да го пуштат дома малку да се одмори. Сè изгледаше оптимистички“, рече тогаш Рамљак.
За жал, и покрај лекувањето и надежта, состојбата на пејачот се влошила. Неколку недели пред смртта, Бешлиќ објави песна посветена на својата сопруга Сејда.
