Првата дама на САД, сопругата на претседателот Доналд Трамп, Меланија Трамп вчера го прослави 50-от роденден.
Иако не се појавува често во јавноста и главно е во сенка на нејзиниот сопруг, Меланија секогаш го привлекува вниманието на медиумите, а позната е и по својот стајлинг.
Многумина ја сметаат за интригантна жена со животен тек кој наликува на филмска приказна. Меланија поминала повеќе од возбудлив половина век, а што е следно, се прашуваат многумина.
Таа за својот роденден доби честитка и од својот сопруг, претседателот Доналд Трамп кој на Твитер напиша: „Среќен роденден, Меланија – нашата прекрасна прва дама!”
Happy Birthday to Melania, our great First Lady!
— Donald J. Trump (@realDonaldTrump) April 26, 2020
Честитки за 50. роденден на Меланија го преплавија и Твитер, а некои од нив се ретвитнати и по 6.000 пати, со често користење на скратеницата ФЛОТУС, што значи Прва Дама на Соединетите Американски Држави (First Lady of The Unites States).
Како што се очекуваше, Меланија и Доналд овој ден го минаа дома, како и повеќето Американци – поради пандемијата на новиот коронавирус.
Меланија на здравствените работници и децата во болниците во 10 сојузни држави минатата недела им испрати подарок пакети – како што самата рече, „како мал знак на благодарност за нивната храброст и пожртвуваност во време на коронавирусот”.
Поранешната манекенка, по потекло од Словенија, во Америка замина во 1996 година, со цел да оствари кариера во модниот свет, а девет години подоцна, во 2005 година се омажи за Доналд Трамп. Парот една година подоцна го доби синот, Барон.
Инаку, Меланија Трамп, како прва дама, ја промовира својата „Би-Бест“ (Биди најдобар) кампања против злоупотреба и вознемирување на интернет.
