Медиумите во Италија известија за хеликоптерска несреќа во која загинале седум лица, меѓу кои и четиричлено семејство од Словенија. Хеликоптерот паднал на југот на Италија.
Хеликоптерот исчезнал од радарот во Кастелпагано ди Апричена, рурална област во провинцијата Апулија, по што армијата и пожарникарите започнале потрага.
Заменик-гувернерот на Апулија, Рафаеле Пијемес, изјави дека хеликоптерот е пронајден и дека сите седум патници и членови на екипажот загинале, објави италијанскиот дневен весник Кориере дела сера.
Меѓу загинатите има и четиричлено словенечко семејство, меѓу кои и 13-годишно девојче. Другите жртви се локален лекар и двајца пилоти.
Хеликоптерот кој секојдневно летал од Фоџа, во Апулија на островот Тремита во Јадранското Море, паднал најверојатно поради лошото време.
