Ивана Трамп почина на 73-годишна возраст. Била пронајдена без свест во нејзиниот дом во Њујорк, неколку часа пред да оди на закажаниот термин во фризерски салон.
Службениците за итни случаи и инспекторите ја нашле на дното од скалите во нејзиниот дом на Менхетен нешто пред 13 часот во четврток. Официјалната причина за смртта се уште не е потврдена.
„Беше многу тажен ден“, рече Ерик Трамп додека го напушташе домот на неговата мајка во близина на Централ Парк.
Ивана ги помина последните денови подготвувајќи се за долгоочекуваното патување во Сент Тропе кое требаше да се случи денес (во петок) и планираше да го посети својот редовен фризер на денот кога беше пронајдена мртва, изјави вработена во салонот за Daily Mail.
Веста за смртта на Ивана прв ја сподели поранешниот претседател на САД, Доналд Трамп, преку објава на неговиот профил на Truth Social во четвртокот попладне.
„Многу сум тажен што ги информирам сите оние кои ја сакаа, а ги има многу, дека Ивана Трамп почина во својот дом во Њујорк“, напиша тој.
Трамп имаше три деца со својата поранешна сопруга, со која се ожени во 1977 година и се разведе во 1992 година, а својата прва сопруга ја опиша како „убава, неверојатна“ жена.
Детективите веруваат дека Ивана Трамп починала откако паднала по скали, најверојатно поради болест, изјави полициски функционер за Дејли њуз. Се верува дека смртта е ненадејна. Властите истражуваат дали срцевиот удар можеби имал улога во нејзината смрт, објави весникот, а пренесува српскиот мондо.
