– По краткотрајното затоплување на времето, овој викенд следува повторно значително постудено време од просекот за овој период од годината. Времето ќе биде променливо облачно со сончеви периоди, на некои места и подолги. Ќе има услови и за локално провејување на снег, а ќе биде и ветровито, односно ќе дува умерен, повремено на некои места засилен ветер од североисточен правец. Што се однесува до температурите, тие ќе бидат доста ниски за овој период од годината и минималните понекаде ќе се спуштаат дури до околу -10 степени, додека максималните дневни ќе се искачуваат во интервалот само од 2 до 10 степени – вели метео прогнозерот Славчо Попоски.
Според Попоски следната седмица ќе имаме значително постабилно, а од средината на седмицата и сè потопло време. Ќе има и многу повеќе сонце, додека нешто повеќе облачност локално ќе има само во вторник и тоа особено кон крајот на денот и во текот на ноќта кон среда, кога ќе има услови за локални слаби врнежи од дожд и снег. Минималните температури сè уште на повеќе места ќе се спуштаат под нулата, односно некаде ќе се спуштаат и под -5 степени, додека максималните дневни ќе се искачуваат во интервалот од 5 до 13 степени. Веќе од средината на неделата се очекува поголемо затоплување и значителен пораст на максималните дневни температури и следниот викенд понекаде ќе се искачуваат до околу 20 степени. Ваквата состојба укажува на тоа дека во текот на следната недела пролетта полека, но сигурно ќе почне да се буди.
