Легендарното трио „К-15“, Бранко Огњановски, Васко Тодоров и Љупчо „Бубо“ Каров се собраа во кафеана и оттаму преку видео во нивен препознатлив стил им се обратија на обожавателите. Притоа, тие одбележаа 30 години од почетоците на „К-15“. А воедно и најавија некакво враќање… Но, повторно без детали, така што останува да чекаме кога и во каков формат ќе се случи обединувањето на ликовите Миле Паника, Тошо Малерот и Цацко Конопишки.
Во видеото тие наздравуваат и повторно ја начнаа темата што многумина ги интересира.
View this post on Instagram
„Добро, нешто ќе правиме сигурно. Дали ќе биде документарен филм, дали ќе биде во живо, дали ќе биде во живо емисија… Ќе ви јавиме со десертот. А вие ако сакате да честитате роденден, направете го тоа во коментари“, го заврши Бранко видеото.
Да потсетиме, првата епизода на „К-15“ беше емитувана на 23 ноември 1994 година. Духовитите фрази и конверзации на ликовите Миле Паника, Тошо Малерот и Цацко Конопишки бргу станаа дел од популарната култура кај нас, а кратките хумористично-сатирични скечови беа најгледаната програма во сабота навечер.
Создавачите на емисијата, Бранко Огњановски, Васко Тодоров и Љупчо „Бубо“ Каров, ја забавуваа телевизиската публика, но и упатуваа силна социјална, политичка и економска критика, особено за нелогичностите во македонското општество, етничката толеранција, стереотипите и табу-темите.
„К-15“ се емитуваше на повеќе македонски телевизии, меѓу кои А1, Сител, Канал 5, МТВ и Алфа.
Последната епизода беше емитувана на 23 март 2013 година.
