Американскиот суд одлучи судењето помеѓу Џастин Балдони и Блејк Лајвли да се одржи на 9 март 2026 година. Ова соопшти судијата Луис Лиман, откако актерите се тужеа меѓусебно поради наводи за сексуално вознемирување, клевета, граѓанска уцена и други прекршувања.
Имено, Лајвли поднесе голема тужба против нејзиниот колега и режисер Балдони во филмот „Ова завршува со нас“ (It Ends With Us). Во таа правна постапка, Лајвли го обвини Балдони за сексуално вознемирување и тврдеше дека тој, заедно со неговиот тим, смислиле план за „да ја уништи нејзината репутација“.
Потоа, на почетокот на новата година, Лајвли поднесе уште една тужба против Балдони, овој пат за „тешка и сериозна емоционална вознемиреност“.
Тимот на Балдони се спротивстави на Лајвли и побара 400 милиони долари, наведувајќи ги наводите за граѓанска клевета, клевета, лажно претставување и нарушување на приватноста.
За потсетување, „Дејли мејл“ неодамна наводно доби снимка на која Балдони ѝ кажува на актерката дека „мириса убаво“, што таа го наведе во тужбата како реплика поради која се чувствува непријатно, но се чини дека тоа било заедничка шега за време на снимање на интимна сцена за филмот.
