Договорот меѓу Русија, Украина, Меѓународниот Црвен крст и ОН доведе до предавање на баталјонот Азов и на другите киевски војници кои беа во фабриката за челик Азовстал во Мариупол. Катерина Прокопенко, сопруга на командантот Денис Прокопенко, кој се предал на Русите дури на 20 мај, зборува за тоа што се случува денес со војниците. Прокопенко наводно бил однесен „со специјално оклопно возило“ во областите под контрола на руската армија – посебен трансфер кој бил оправдан со фактот дека „жителите го мразеа и сакаа да го убијат за многубројните извршени злосторства“.
Тајниот пакт
Во интервју за италијанскиот дневен весник „Кориера дела Сера“, Катерина тврди дека Киев, Москва, Црвениот крст и ОН имаат таен пакт за заштита на животите на војниците. Таа и Јулија, сопругата на војникот Арсениј Федоров, велат дека деталите не можат да се откријат:
„Во контакт сме со преговарачите, но не можеме да откриеме информации за тоа. Она што можеме да го кажеме е дека е можно затворениците периодично да телефонираат со членовите на семејството, веројатно приоритет имаат повозрасните“.
Војниците на Мариупол одбиле да им се предадат на Русите бидејќи тоа би значело „сигурна смрт“. Сега сите уапсени се во Оленивка, село во регионот на Доњецк.
Сите војници се затворени во казнената колонија број 52, која располага со простор за до три илјади луѓе. Катерина разговарала и со „Гардијан“, каде раскажала за телефонскиот разговор со Денис кој траел триесетина секунди пред да згасне линијата.
Командантот ѝ рекол дека е добро: „Му дадоа вода и храна. Условите ги исполнуваат условите од договорите и не претрпеле насилство во овој период. Не знаеме што ќе се случи понатаму, но во моментов има трети страни како ОН и Црвениот крст кои ја држат ситуацијата под контрола“.
Лидерот на проруските сепаратисти од Доњецк Денис Пушилин вчера изјави дека западњаците ќе можат да бидат сведоци на судењата на војниците од Азовстал. Судиите во Доњецк и руските власти, додаде тој, ги подготвуваат досиејата за воениот суд.
Сопругите во акција
Во меѓувреме, според Гардијан, двете сопруги на војниците Катерина и Јулија сакаат да основаат независна организација за поддршка на борците на Азовстал.
„Целта е да се организираат неделни повици со затворениците, да се разоткријат руските лаги на нашите деца, да се осигураме дека нивните услови ќе останат задоволителни – кревет, лекови, вода и храна и да се води кампања за нивно брзо ослободување“, објаснуваат тие.
Според Русија, речиси 2.000 Украинци се предале во урнатините на Мариупол, каде со недели давале отпор во бункерите и тунелите на челичарницата. Одбраната на Азовстал беше предводена од Азовскиот полк, кој Русите го сметаа за „нацистички“ и со силни врски со крајната десница.
Пушилин, пишува новинската агенција Ројтерс, рече дека на „нацистичките криминалци“ треба да им суди суд. Прво ќе се одржат таканаречените „средни“ судења, вклучително и еден во Мариупол. Меѓународниот комитет на Црвениот крст соопшти дека ги регистрирал имињата и личните податоци на оние кои ја напуштиле челичарницата. Кремљ најави дека затворениците ќе бидат третирани според меѓународните стандарди. Вчера Тарас Чмут, директор на невладината организација Повернис Живим или „Дојди дома жив“, објави дека за време на опсадата извршил мисии со хеликоптери. „Го обезбедивме материјалот на конкретно барање на опколените, кои комуницираа со нас преку Интернет“, вели Чмут и додава „за жал, некои хеликоптери беа соборени, а пилотите загинаа. Понекогаш при враќањето можеа да ги евакуираат ранетите кои беа во фабриката за челик“, објасни Чмут.
