Познатиот рок и метал музичар Ози Озборн (71) изјави дека е свесен за Паркинсоновата болест од која боледува уште од 2003 година, но нема намера никогаш да ја остави музиката и да се пензионира.
Принцот на темнината одлично се држи, а неодамна објави и нов албум, откако претходно откри дека изминатата година му била многу тешка токму поради оваа болест.
– Минатата година бев во многу лоша состојба поради здравјето. Имав операција на грбот која беше доста проблематична – изјави Ози.
Светските медиуми пишуваат дека музичарот годината која е зад нас ја опишал како „проклет пекол“.
– И покрај тоа што беше тешко, не смеам да дозволам болеста да ме запре. Нема да се откажам од музиката – порача Ози.
71-годишниот музичар неодамна го претстави новиот материјал, а тој дури порача и дека набргу сака да објави уште еден албум.
Ози смета дека на фановите им должи нова музика и дека е фокусиран само на тоа.
