Марина Ацевска Филиповска завршила средно економако училиште во Битола, а живее во живописно село Добрушево, во областа Пелагонија, во околината на градот Битола.
Според легендата, името на селото се поврзува со тоа што прв во месноста се населил некојси Добруш. По него, подоцна било именувано селото.
Со одгледување на цвеќиња се занимава уште од малечка.
– Тоа сум го наследила од мајка ми, уште како мала се врткав околу неа кога ке ги расадуваше и одгледуваше цвеќињата, па така продолжив и јас – ни вели Марина.
За уредување на дворот задолжени се двајцата сопружници, но бидејќи Марина е послободна, таа посебно и повеќе е посветена на оваа убавина.
Дворот е прилично голем, се простира на околу 800 квадратни метри. Изобилува со најразлични цвеќиња, од сурфинии, петунии, најразлични видови сардели, темјанушки, медарчиња, трендафили, рози…ах, кој да ги изнаброи!
– За оваа работа треба доста време, доста посветеност и се разбира многу љубов кон растението. Секој ден по неколку часа се грижам за нив, ги наводнувам, ги прихранувам, расадувам…-објаснува нашата цветна дама.
За сончевите дворови, каков што е овој, најмногу успеваат сурфиниите, петуниите, но и едно од најубавите пролетни цвеќиња – вербената. Тука има бројни повеќегодишни и сезонски цвеќиња – темјанушките, хризантемите, џунџулето…, и сите го сакаат сонцето и нежната рака на Марина.
– За под сенка, за на балкон одлични се импатијата или винката, хибискусот, а некако и сарделите се многу поубави под сенка, но можат и на сонце – објаснува Марина.
Нејзин најголем предизвик е дворот да изгледа уреден, чист и се што е во него да биде негувано и со многу љубов одгледувано бидејќи, како што вели Марина, ако се нема желба, нема ни успех.
За крај ова е градинарскиот совет од нашата соговорничка за сите оние кои сакаат да се охрабрат и да почнат да се занимаваат со одгледување цвеќе.
– Прво треба да се има желба и доста слободно време, за почеток може да се почне со одгледување на сардели, и јас почнав со нив, тие се некако поотпорни на временските услови – низ насмевка охрабрува Марина.
Инаку, Марина е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во овие добродушни фотографии од село Добрушево, од дворот на добрата, вредна Марина.
Фото- приватна архива
