Британската пејачка Џесика Вер (35), објави спот кој е снимен во Белград и тоа во синиот воз на некогашниот лидер на СФРЈ, Јосип Броз Тито.
Спотот е наменет за песната „Spotlight“, која се наоѓа на нејзиниот најнов албум – „What’s your pleasure“.
Пејачката преку Инстаграм ги извести своите обожаватели дека спотот е објавен.
„Играјте, играјте, играјте и научете ги потезите, а потоа играјте со мене на моите настапи“, напиша Џесика на Инстаграм.
Пејачката ја искористи оваа прилика да му заблагодари и на тимот од Белград, кој учествуваше во овој спот.
Инаку, со синиот воз, Тито се возеше од 1959 до 1980 година, а со него помина повеќе од 600.000 километри.
Покрај Тито, во возот се превезуваа повеќе од 60 странски државници и делегации, а една од патничките беше и британската кралица Елизабета Втора.
Она што е посебно интересно е дека во возот сѐ е автентично – онака како што било во 1959 година, кога тој тргнал на своето прво патување.
Токму со синиот воз е пренесено и телото на Тито по неговата смрт во 1980 година, од Љубљана во Белград.
