Генералниот секретар на Град Скопје, Ѓоко Велковски кој завчера поднесе оставка бара градоначалничката Данела Арсовска јавно да му се извини, а ако тоа не го стори во рок од 48 часа, тој ќе поднесе тужба за клевета.
– На ден 12 септември 2022 година, на одржана прес-конференција од страна на градоначалничката Данела Арсовска се изнесени невистинити тврдења за факти штетни за мојата чест и углед, кои што потоа се пренесени преку соопштение до јавност од кабинетот на Градот Скопје. Со индигнација ги отфрлам тврдењата дека на било кој начин сум работел несовесно и сум влијаел на процесот за избор на компанија за пречистителната станица! Се работи за клеветничка изјава која го нарушува мојот углед и чест, објави Велковски на Фејсбук.
Тој бара, според одредбите од Законот за граѓанска одговорност за навреда и клевета, (член 13 и 14), Арсовска во целост да ја повлече изјавата и да се извини за, како што вели, „невистините и лагите кои ги шири и со кои ја манипулира јавноста“.
– Во спротивно, доколку не постапи по ова барање во законски предвидениот рок од 48 часа, ќе поднесам тужба за утврдување граѓанска одговорност за клевета, додава Велковски.
