Шкотскиот актер Рори Меккан се прослави со улогата на Сандор Клеган наречен Куче во серијата „Игра на тронови“. Освен тоа, тој е еден од ретките ликови кои се појавуваат во сите 8 сезони на оваа екстремно популарна серија. Меѓутоа, пред да ја добие улогата во 2011, Меккан бил помалку познат актер со не многу запазени улоги во тв-серии и филмови. Затоа во посебната тв-емисија за Game of Thrones Reunion Special, признал дека додека не ја добил улогата за „Игра на тронови“, живеел во шатор.
„Живеев во шатор, буквално во шатор и повремено крадев храна“, рекол Меккан на водителот Конан Обрајан. „На крајот ја добив работата и се средив за наеднаш да ме возат со прекрасни автомобили на снимањето на најдобрата тв-серија на светот. Тоа само покажува дека со малку среќа, животот може да се промени. Неверојатно!“, изјавил Меккан.
Меккан пред почетокот од снимањето на серијата, живеел во Исланд. Таму снимал филм за Вајкинзи во кој глумел и Џерард Батлер, а кога завршило снимањето одлучил да остане таму. Очекувал дека неговиот агент ќе го побара и ќе му се јави дека добил улоги во некои филмови или серии, но бидејќи тоа не се случило, тој останал да живее на Исланд 11 месеци. „Дојде зимата, а локалното население ми рече дека сум единствениот на островот кој живее во шатор, па ми помогнаа да се сместам во куќа и да добијам работа како столар“, признава Меккан.
