Точно 13 месеци од покренувањето на истрагата, УСКОК покрена обвинение против 14 лица за давање мито во замена за лажни потврди за вакцинација против ковид-19, пишува српски „Курир“.
Полицијата во соработка со УСКОК, веднаш по сознанијата за измами со ковид-потврдите кои биле купени за најмалку 100 евра, под лупа ставила вкупно 243 лица, па во однос на (пре)останатите 224, истрагата сè уште е во тек.
Како што е соопштено, меѓу 14-те обвинети има и еден фратар, а УСКОК ги обвинува дека биле во Загреб од јули до октомври 2021 година, иако знаеле дека не биле вакцинирани против ковид-19 и дека затоа немаат право на дигитален ковид-сертификат на ЕУ, од медицинската сестра П. Р. во Домот на здравје Загреб Запад, но преку посредник, побарале во информацискиот систем на Министерството за здравство лажно да ги внесе дека се вакцинирани.
Голем број познати личности добиле лажни сертификати.
По договарањето со посредникот, тој на медицинската сестра ги предал личните податоци на голем број лица кои сакале да се здобијат со потврди без да се вакцинираат. А притоа ѝ ги проследувал и парите што му ги давале нарачателите. Медицинската сестра потоа влегувала во информацискиот систем на Министерството, па дури и кога била на боледување, неосновано впишувала дека поединци се вакцинирани и врз основа на тоа неосновано добивале дигитални ковид-потврди на ЕУ.
Бидејќи УСКОК засега одлучил да обвини само 14 лица, се претпоставува дека се работи за лица кои веднаш по избивањето на аферата во јавноста го признале делото и најверојатно веднаш ќе се спогодат со обвинителството пред надлежниот суд.
Во меѓувреме, медицинската сестра го напуштила споменатото работно место, а кога избила аферата, голем број познати имиња кои на овој или оној начин се стекнале со спорните сертификати и сè уште се под истрага, се пејачот Тони Цетински, оперската пејачка Лана Кос, сопственик на фолк-клуб, директори на познати компании, ТВ водителка и нејзиниот сопруг, бројни приватни претприемачи, еден поранешен учесник на „Големиот брат“ и бројни спортисти.
Инспекторите се сомневаат дека медицинската сестра со 11 посредници заработила над 28.000 евра и 36.000 куни, кои ги поделиле меѓу себе. Во своја одбрана П. Р. рекла дека не ги познавала луѓето кои ги внесувала во системот, туку дека ѝ доаѓале само посредници кои ѝ носеле списоци со податоци и пари.
