Продуцентите Глен Вајс и Рики Киршнер се сигурни дека во оваа улога ќе биде „смешен и подготвен на се“.
Американскиот комичар Џими Кимел ќе биде водител на 95-тото доделување на Оскарите кое ќе се случува на 12 март 2023 година. Веста во понеделникот ја објави Асошиејтед прес (АП), цитирајќи ги организаторите на настанот.
Продуцентите Глен Вајс и Рики Киршнер изјавија дека се многу возбудени поради враќањето на Кимел и уверени дека тој ќе биде „смешен и подготвен на се“ како водител на церемонијата.
„Да ми се понудат Оскарите по трет пат е или огромна чест или некаква стапица. Во секој случај, благодарен сум на Академијата што ме покани толку брзо откако сите други ме одбија“, се пошегува самиот Кимел.
Кимел веќе беше водител на Оскарите во 2017 и 2018 година.
„Џими е совршен домаќин кој ќе ни помогне да објавиме неверојатни уметници и филмски наслови на 95-тата церемонија“, рече Бил Крамер, извршен директор на Американската академија за филмски уметности и науки.
