Австралиските научници веруваат дека се на пат да го вратат изумрениот вид тасмански тигар и велат дека би можеле да го добијат првото живо младенче во следната деценија.
Општо се верува дека тасманскиот тигар, чие научно име е Thylacinus, исчезнал од австралиското копно пред 2.000 години. Последниот познат примерок угинал во 1936 година во заробеништво во зоолошката градина Бомарис во Хобарт во австралиската островска држава Тасманија.
Тасманскиот тигар наликува на куче, телото му е долго околу еден метар (без опашка), има сиво-кафеава боја со 12 до 14 црни попречни ленти на грбот. Женката раѓала 2 до 4 младенчиња кои би останувале кај неа околу три месеци. Живеел во Австралија, Тасманија и Нова Гвинеја.
