Милијардерот и сопственик на Твитер, Илон Маск, им предложил на вработените во компанијата да се подготват за зголемување на обемот на работа и што е можно поскоро да одлучат дали ќе работат понатаму, или ќе си одат, пренесува Вашингтон пост.
Според Вашингтон пост, Маск им рекол на вработените дека ќе треба навистина да работат напорно за да создадат „пробив на Twitter 2.0“.
Имено, на вработените им бил испратен формулар по имеил со барање да се согласат да продолжат да работат на Твитер, на што мора да се одговори „Да“ до 17:00 часот на 17 ноември. Оние кои нема да одговорат во предвиденото време ќе бидат отпуштени и ќе добијат тримесечна отпремнина.
Претходно, порталот Платформер, повикувајќи се на вработени во социјалната мрежа, објави дека Маск продолжува да отпушта луѓе и станува „опседнат со идејата“ дека вработените во компанијата ја саботираат социјалната мрежа.
