Маја Шупут и Натали Балмикс снимија нова песна со наслов „Недоволно убава“, која излезе пред неколку дена и веќе привлекува големо внимание кај публиката. По тој повод, Маја за „Шоубаз“ откри како настанал дуетот, зошто токму ја избрала Натали, но се осврна и на бројните шпекулации дека во песната се кријат скриени пораки.
Таа истакна дека реакциите се одлични и дека песната брзо почнала да се шири на социјалните мрежи.
„Реакциите се навистина одлични. Луѓето веќе ја пеат песната, споделуваат снимки и уживаат во неа. Само што излезе, а веќе се чувствува дека е многу заразна бидејќи веднаш почнаа препејувања и објави на социјалните мрежи. Мислам дека тоа се навистина добри први знаци и дека можеби веќе имаме летен хит. Се надевам дека инстинктот не ме излажал“, изјави таа.
Маја објасни дека изборот на Натали го направиле нејзините блиски соработници, стилистот Марко Грубниќ и шминкерот Карло Русан, кои ѝ предложиле токму неа.
„Додека секој ден го снимав Суперталент, моите најблиски соработници Марко Грубниќ и Карло Русан постојано ми велеа дека е време да ја снимам таа песна. Таа веќе долго стоеше во фиока, но постојано барав машки изведувач и не можев да најдам некој што ќе ми одговара. Тогаш тие се сетија на Натали“, откри пејачката.
Таа додаде дека по првиот контакт сè се одвивало многу брзо и без одложување.
„Додека бев на снимање, тие ја контактираа Натали Балмикс, таа веднаш прифати и за три дена сè беше договорено. Потоа за неколку дена заминавме во Македонија за да ги снимиме вокалите“, рече таа.
Маја нагласи дека целиот проект бил завршен многу брзо и дека е задоволна од соработката.
„За само еден месец ја снимивме песната, спотот, се запознавме и сè реализиравме. Тоа е мојот ритам на работа. Најдобро функционирам кога работите се случуваат спонтано и кога сè е свежо. Натали има силна сценска појава, зрачи пред камера и делува како да е цел живот на сцена“, изјави таа.
На крајот, таа се осврна и на коментарите дека песната има врска со нејзината наводна раскинување со Шиме Елез, нагласувајќи дека тоа не е точно.
„Колку и да пишуваат порталите и да бараат скриени значења, оваа песна нема никаква порака упатена кон никого. Ова не е песна што носи големи животни пораки, ниту е поезија. Напишана е исклучиво за забава, опуштање и добра атмосфера – за шега и за сите девојки кои ќе се препознаат во стиховите и едноставно сакаат да уживаат“, порача Маја Шупут.
