Планинарот Мајкл Напински (45), кој беше спасен откако се изгуби во текот на ноќта во американскиот Национален парк „Маунт Рајнер“, се вратил во живот и покрај тоа што срцето престанало да му работи и не му чукало 45 минути.
Напински се изгубил пред десетина дена, кога температурите биле многу ниски.
Со пријателот отишол на планинска прошетка на 7 ноември, но во еден момент решиле да се разделат. Пријателот тргнал со скиите да се спушта по удолницата, додека Напински продолжил да пешачи. Тие се договориле да се сретнат во подножјето.
– Бев мошне блиску до крајот на патеката кога временските услови се влошија и во еден момент не можев да видам ништо. Не сум сигурен што се случи потоа. Мислам дека паднав – се присетил Напински за „Сиетл тајмс“.
Кога не пристигнал на договореното место, неговиот пријател ги известил ренџерите кои започнале со потрагата. Поради лошите временски услови, хеликоптерот не можел веднаш да полета. Сепак, спасувачката екипа во хеликоптерот по извесно време успеала да полета и конечно да го пронајде по еден час. Тој бил пренесен во болницата во бесознание, но имал пулс. Но, наскоро срцето престанало да му чука.
– Умре додека беше во ургентниот центар, поради што бевме во единствена ситуација да примениме сè што ни стои на располагање за да се обидеме да му го спасиме животот – рекла д-р Џанел Бадулак.
Лекарите го реанимирале и го приклучиле на апарат ECMO, кој му ја пумпал крвта од телото во белите дробови и срцето, овозможувајќи на тој начин размена на гасовите и одржување на крвотокот во телото.
По 45 минути, срцето на Напински повторно почнало да чука, а два дена подоцна тој се разбудил.
Иако сè уште закрепнува бидејќи неговите бубрези не функционираат правилно, неговото срце и понатаму се бори да ја циркулира крвта низ телото, а има и смрзнатини, лекарите сметаат дека целосно ќе закрепне.
– Тој се врати од мртвите. Можеби не е најпрецизно медицински да се каже, но неговото срце не чукаше 45 минути. Едноставно е неверојатно – рекол началникот на одделот за интензивна нега, д-р Саман Арбаби.
