Поп-ѕвездата Дуа Липа се појави како изненадување на 76. издание на Берлинскиот меѓународен филмски фестивал, каде што му даде поддршка на својот вереник Калум Тарнер на светската премиера на неговиот нов филм „Кастрење на грмушките од рози“ („Rosebush Pruning“).
Двајцата прошетаа по црвениот тепих во Берлинале палатата на 14 февруари, па празникот на љубовта го одбележаа во свечена и романтична атмосфера, пред објективите на бројните фоторепортери. Дуа се одлучи за проѕирна чипкана креација со романтичен дизајн, додека Тарнер се појави во софистициран кафен костум.
Нивната блискост, разменетите насмевки и суптилните гестови привлекоа значително внимание.
По кусото фотографирање, пејачката се повлече во втор план, оставајќи го фокусот целосно на актерот и неговата премиера.
Тарнер ја има главната улога во „Кастрење на грмушките од рози“, сатиричен филм во режија на Карим Ајнуз, режисерот на „Мотел Дестино“. Во актерската постава се вклучени и Рајли Киоф, Џејми Бел, Ел Фенинг, Лукас Гејџ, Трејси Летс и Памела Андерсон.
Дејствието се концентрира на четворица американски браќа и сестри кои живеат изолирано, ослонувајќи се на наследеното богатство и занемарувајќи ги потребите на нивниот слеп татко. Одлуката на најстариот брат да се пресели кај својата партнерка предизвикува низа настани што ги разоткриваат наталожените семејни лаги и ја нарушуваат кревката рамнотежа во домот.
На прес-конференцијата, Тарнер беше прашан и за шпекулациите дека би можел да биде следниот Џејмс Бонд. Со воздржана насмевка кратко одговори дека е „прерано за такво прашање“ и не сакаше да навлегува во детали.
Неговата колега Трејси Летс ја искористи ситуацијата за хумор, изјавувајќи: „Извинете, јас сум следниот Џејмс Бонд!“, на што Тарнер низ смеа возврати: „Трејси, мислев дека нема да кажеш ништо“.
