Дорис Драговиќ, која важи за една од најголемите музички диви на овие простори денес го одбележува својот 65. роденден. Сплиќанката, родена како Доротеа Будимир, со децении е присутна на сцената, а нејзините песни оставија силен белег врз повеќе генерации.
Љубовта кон музиката ја покажувала уште од најрана возраст, а како свои музички идоли ги наведувала Арсен Дедиќ, Габи Новак и Тереза Кесовија.
Во раните 80-ти години стекна поширока популарност како членка на групата „Море“, во која настапуваше од 1982 до 1986 година.
Во 1986 година ја започна успешната соло кариера, а истата година ја претставуваше тогашна Југославија на Евровизија во Берген. Со песната „Желјо моја“, на композиторот Зринко Тутиќ, го освои 11-тото место со 49 поени, а песната прерасна во безвременски хит што ја вброи меѓу најпопуларните пејачки во регионот.
Во периодот што следеше, низа хитови како „Седум мориња, седум гори“, „Селам ти јас“, „Тажна е ноќта“, „Твоја во душата“ и „Пеј срце мое“ ја зацврстија нејзината позиција како една од најзначајните личности во домашната поп музика. Нејзиниот препознатлив вокал и силната емоција во изведбите ја освоија публиката низ поранешна Југославија.
Во 1999 година триумфираше на Дора со песната „Марија Магдалена“, дело на композиторот Тончи Хуљиќ, со која ја претставуваше Хрватска на Евросонг во Ерусалим.
Покрај музиката, Дорис е позната и по својата блискост со фудбалскиот клуб Хајдук и неговите навивачи, па во периодот од 1993 до 2000 година го носеше прекарот „Кралица на Торцида“.
Во приватниот живот, од 1990 година е во брак со поранешниот ватерполист Марио Будимир, со кого има син Борна, роден истата година.
Во текот на кариерата има објавено 14 студиски албуми, бројни компилации и синглови, со што го потврдува својот статус на музичка икона. Нејзиниот најнов сингл „Копје љубови“ беше објавен во 2024 година.
Со своите настапи ги исполнуваше најголемите концертни сали во Хрватска, меѓу кои Арена Загреб, Спаладиум Арена и многу други.
