Страв и надеж за најголемиот досега, од сите. Име познато во секој агол на планетата. Светот трепери за Пеле, вечниот крал и симбол на фудбалот, титула која „ја дели“ со другиот великан кој неодамна почина: Диего Армандо Марадона.
Пеле е хоспитализиран веќе шест дена во израелската болница „Алберт Ајнштајн“ во Сао Паоло, во саботата му беше оперирано дебелото црево поради сомневање за тумор. Хистолошкото испитување ќе разјасни за што точно станува збор.
Грациозен каков што беше на фудбалскиот терен, одмерен, така ги минува и болничките денови. Пеле не ја загуби ни желбата за победа, па на социјалните мрежи напиша дека се соочува „со овој натпревар со насмевка на лицето, со многу оптимизам“ и опкружен со љубовта на неговот семејство и пријателите.
Инаку, Пеле влегол во болницата за срцеви прегледи и лабораториски тестови кои требале да бидат рутински, но откако се појавил сомнеж за тумор бил задржан и опериран во саботата.
Фудбалскиот ас е со голема верба дека ќе успее, а со него е и целиот свет, не само фудбалските фанови. Поранешниот шампион, трипати светски шампион со Бразил, е безвременска икона, отпорна на времето и на генерациите што минуваат, и затоа продолжува да ужива светска слава.
