Првата дама на Америка, Меланија Трамп во понеделникот ја пречека елката во Белата куќа, продолжувајќи ја долгогодишната традиција, дури и за време на пандемијата на коронавирусот.
Оваа година божиќната елка потекнува од Западна Вирџинија. Воениот музички бенд ги свиреше празничните песни „O Christmas Tree“, „O Come, All Ye Faithful“ и „Hark, the Herald Angels Sing“ кога првата дама се појави без заштитна маска од Белата куќа за да ја поздрави кочијата со дрвото.
За разлика од изминатите години, освен првата дама, сите присутни носеа заштитни маски следејќи ги здравствените протоколи.
Пристигнувањето на елката во Белата куќа обично го означува почетокот на празничниот период.
Меланија Трамп беше насмеана, во празничен дух, а украсувањето на историската вила ќе биде нејзината последна задача како прва дама на Америка, пред Џил Бајден да ја преземе улогата во јануари.
„Среќен Божиќ“, рече Меланија, додека се смешкаше и мавташе кон камерите за време на краткиот настан.
Кабинетот на првата дама наскоро официјално ќе ги открие Божиќните украси и декорации во Белата куќа.
