Ела Дворник гостуваше во новата епизода од емисијата „5 минути до крајот“ на авторот Кристијан Јалшиќ, во која гостите одговараат на прашања како да им останале уште само пет минути живот. Во искрен разговор, таа проговори за смртта, верата, родителството и своите најдлабоки убедувања.
„Не верувам во Бог како единка. Верувам во вселената“, изјави Ела, појаснувајќи дека за неа Бог не е личност, туку чувство на сигурност и нешто што го надминува физичкото тело, кое го опишува како „ограничување“.
Таа нагласи дека верува оти свеста е многу поголема од животот што моментално го живееме, а смртта не ја гледа како крај, туку како премин. Според неа, потешко е да се биде неверник отколку верник, додавајќи дека верата кај некои луѓе создава контрола, а кај други е начин на справување со смртноста.
За смртта на својот татко зборуваше без патетика, признавајќи дека од тој период има „блекаути“, но денес ја доживува како неизбежен дел од животот. Смета дека луѓето треба да се помират со фактот дека сите еден ден ќе исчезнат и дека токму затоа треба да се ценат додека се тука. Иако не се моли, вели дека често се сеќава на својот татко.
Без задршка зборуваше и за сопствените грешки. „Грешев многу“, рече таа, додавајќи дека се покајала за своите постапки, кои ги дефинира како свесно повредување на друга личност. Според неа, не е погрешно да се признае вина, туку да не се научи ништо од неа.
Ела одговори и на прашањето дали родителите ја искористиле за слава: „Не, но можеме да го свртиме прашањето – дали јас ги искористив нив за сопствена слава? Не. Тоа беа поинакви времиња и сè беше како што требаше да биде“.
На крајот, таа истакна дека верува оти е добар пример за своите деца и дека сака да им остави јасна животна порака: „Правете што сакате, сè додека не им правите лошо на другите луѓе“.
