Холивудскиот режисер, глумец и продуцент Мел Гибсон (64) го изгуби ангажманот во долгоочекуваното продолжение на анимираниот филм „Побуна во кокошарникот“ (Chicken Run) на Нетфликс, тврдат извори блиски до продукцијата.
Одлуката доаѓа како реакција на антисемитскиот инцидент на Гибсон.
Глумицата Винона Рајдер (48) дала интервју за Сандеј тајмс во кое меѓу другото зборува за спорната забава во 1995 година, на која, како што тврди, Мел Гибсон упатил некоректни шеги поврзани со нејзината вера.
Гибсон наводно ја прашал дали таа ја избегнала „печката“ и дали сега од тоа што е со нејзиното друштво, ќе добие СИДА, (алудирајќи на геј-пријателката на Рајдер).
Адвокатскиот тим на Гибсон ги негирал обвиненијата за кои тврдат дека се лажни уште откако се појавиле, но Винона Рајдер упорно стои зад нив.
Глумицата додала дека Гибсон подоцна се обидел да се извини за неговите навредливи изјави, иако тој го негира сето тоа и вели дека „стапил во контакт со неа пред многу години за да се соочи со нејзините лаги, но таа одбила да разговара за тоа“.
„Ова е 100 отсто невистина“, велат адвокатите на Гибсон, тврдејќи дека Винона Рајдер лажела и во колумната за „Џеј Кју“ во 2010 година кога првпат го спомнала наводниот инцидент.
„Верувам во покајување и во простување и се надевам дека господинот Гибсон нашол здрав начин да се избори со своите демони, но јас не сум една од нив. Само со прифаќање на одговорноста за нашето однесување во овој живот можеме да ги поправиме работите и навистина да се почитуваме едни со други, и му посакувам сè најдобро на тој долг пат“, изјавила Рајдер.
