Лепа Брена и Боба Живоиновиќ важат за еден од најпознатите брачни парови на Балканот. По речиси четири децении брак, нивната врска и понатаму изгледа стабилна и исполнета.
Иако ретко зборуваат за приватниот живот, Брена во едно интервју откри интересни детали за нивните почетоци.
– Сосема случајно го видов Боба на насловна страница од ТВ додаток. Имав слободен ден, што беше реткост бидејќи имав и по два концерта дневно. Пријателот ми рече: „Тоа е нашиот најдобар спортист“, а јас му одговорив: „Ју, што е слаток, баш би сакала да го запознаам.“ И веројатно универзумот ме чу – раскажа Брена со насмевка.
Таа откри дека ја освоил со својата живост и поддршка.
– Ми се допадна тоа што беше енергичен и секогаш ми отвораше врати кога имав проблем. Сакав покрај себе силен маж, за да можам понекогаш да бидам слаба, да плачам, да побарам совет, да ме утеши и да ми каже: „Ќе биде сè во ред, ќе го решиме“.
Сепак, и во нивниот дом не минувало без недоразбирања. Брена низ смеа признава дека знае кога работите стануваат сериозни – кога Боба ја вика по вистинското име.
– Во куќа полна со тестостерон, се обидував да држам рамнотежа. Чим не ме вика Беки, туку Фахрета, знам дека ситуацијата не е најдобра.
Иако понекогаш се налутела, вели дека отсекогаш била стабилна личност – нешто што ѝ го вградила мајка ѝ со многу совети кои, иако понекогаш ѝ биле тешки за слушање, подоцна ѝ станале вредни животни поуки.
Пејачката откри и дека кавгите биле почести во раните години од бракот.
– Постојано се лутевме еден на друг. Во брак мора да има договор, а Балканците се навикнати да бидат апсолутни лидери. Жената е составен дел од семејството и со неа мора да се договарате – за бизнис, за децата, за домот… има две илјади теми – заклучи Брена.
