Во рубриката „Како го запознав партнерот“ – денеска ја имаме познатата пејачка Сара Мејс.
Таа со нашите читатели реши да ја сподели приказната околу тоа како се запознала со својот сегашен сопруг, водителот Димитар Атанасовски.
Искрена како и секогаш, Сара се присети на времето кога си ја пронајде својата сродна душа.
– Партнерот, односно мојот сопруг Димитар го запознав на интервју. Тогаш тој беше водител на емисијата „Тротоар“, а јас му бев гостинка. Симпатиите се појавија уште кога си подадовме рака да се запознаеме во продукцијата каде се снимаше интервјуто, но нашата врска започна две години подоцна, односно кога двајцата учествувавме во реалното шоу – „Танц со ѕвездите“. Е, од таму започна се – се присетува Мејс.
Инаку таа и ни откри дека на почетокот од нивната врска се криеле од очите на јавноста, особено од медиумите, а кога ќе им се јавел некој новинар да праша дали има нешто помеѓу нив, двајцата негирале…
– Да, вистина беше, на почеток се договоривме со Димитар да нe откриваме дали сме заедно, бидејќи беше почеток и не знаевме дали ќе успееме. Ете, некои новинари во тоа време нè испочитуваа, а подоцна кога сфативме и двајцата дека тоа е сериозна врска, повеќе не се криевме – вели познатата пејачка, која денес заедно со Димитар се родители на малечката Илина.
