Тројца луѓе починале, а неколкумина се сместени во болница по забавата во базенот со сув мраз на влијателната руска блогерка Екатерина Диденко во Москва.
На снимката што се појави во локалните медиуми се гледа сувиот мраз, кој се става во базенот во затворен простор, поради што веднаш дошло до создавање на јаглероден диоксид, а просторијата се претворила во гасна комора, пишува РТ.
Трагедијата се случила во петокот доцна вечерта. Диденко го славела 26-от роденден со семејството и со пријателите. Никој не очекувал дека прославата ќе се претвори во трагедија кога сопругот на Екатерина, Валентин, донел сув мраз поради постигнување ефект на магла, погодна за сликање и снимање.
На снимката се гледаат гостите облечени во бели заштитни одела, носат очила и сите се собрани околу малиот базен.
Едно лице на глас ги чита инструкциите на пакувањето на сувиот мраз шегувајќи се дека сувиот мраз може да биде многу опасен.
Гостите почнуваат да скокаат во базенот, а „најхрабриот“ меѓу нив се потопува целосно, додека една од гостинките се шегува викајќи: Тој е мртов, не е веќе со нас!“
Набрзо шегата се претворила во реалност. Во контакт со водата, сувиот мраз почнал да испарува правејќи густ облак од јаглерод диоксид.
Тројца луѓе, меѓу кои и сопругот на славеничката, Валентин, починале, а неколкумина завршиле во болница.
Екатерина Диденко е фармацевт и нејзините објави се однесуваат главно на лекови, па многумина се прашуваат како таа и нејзиниот сопруг си дозвлиле да си играат со сувиот мраз.
Останува прашањето од каде добиле толкава количина сув мраз. Според некои претходни постови на Диденко, можно е мразот да го направил нејзиниот сопруг.
Започната е истрага за трагедијата, а прва на списокот на сомнителни е Екатерина, но и сопствениците на сауната во која бил базенот, пишуваат руските медиуми.
