Полското издание на „Вог“ им оддаде почит на жените кои се борат за повлекување на конзервативниот закон за абортус. На фалената насловна страница на „Вог“ се наоѓа голата светска топмоделка и активистка Ања Рубик.
Покрај тоа што е гола, Ања позирала со црвена молња на образот, што стана симбол на бунтот на жените во Полска поради дополнителните забрани за абортус. На фотографијата, интимните делови од нејзиното тело се покриени со црвено платно, со кое ѝ се врзани рацете.
Освен тоа што позираше на фотографиите на насловната и на страниците на полското модно списание, самата Ања го осмислила нивниот концепт и фотографирањето.
Како што рекла, ова е најзначајната насловна страница во нејзината кариера.
– Правото на избор на жените е тест за здраво и прогресивно општество. Овој момент ќе го одбележи полското општество во следните децении. Правото на репродукција е основно човеково право, тоа ни гарантира слобода да одлучуваме за своите животи, тела, здравје и судбина – рекла манекенката.
Насловната на полскиот „Вог“ брзо се прошири на социјалните мрежи. Многумина го споделија како поддршка за протестите што се одржуваа во Полска со денови откако Уставниот суд донесе одлука за забрана на абортусот дури и кога се идентификувани вродени малформации на фетусот. Меѓутоа, под притисок на јавноста, спроведувањето на таа одлука, сепак, е одложено.
Полска е веќе една од најконзервативните земји кога станува збор за абортусот. Досега, абортусот беше дозволен само во случаи на инцест, силување или ако животот на мајката е во опасност.
