Австралиската влада официјално ги стави коалите на листата на загрозени животни по падот на нивниот број поради катастрофалните шумски пожари кои ги намалија нивните живеалишта, пишува „Aljazeera“.
Министерката за животна средина Сузан Леј рече дека ќе има зголемена заштита за животното, класифицирано како ранливо пред само 10 години, во Нов Јужен Велс, Квинсленд и австралиската престолнина.
„Влијанието на продолжената суша, проследено со црните летни шумски пожари, и кумулативните влијанија од болестите, урбанизацијата и губењето на живеалиштата во изминатите дваесет години доведоа до ова“, рече Леј во изјавата во петокот.
„Статусот на загрозена коала значи дека тие и шумските домови треба да добијат поголема заштита според австралискиот национален закон за животна средина“, објави австалиската група за заштита на дивите животни на Твитер. „Не само што ова ќе го заштити иконското животно, туку и многу други видови кои живеат покрај нив“.
Леј рече дека во врска со променетиот статус, владата ќе започне со работа на план за обновување на коалата поддржан со финансирање од 74 милиони австралиски долари (52,9 милиони американски долари).
„Ова мора да биде повик за будење до Австралија и владата да се придвижат многу побрзо за даго заштитат критичното живеалиште од развој и расчистување на земјиштето и сериозно да се справат со влијанијата од климатските промени“, рече регионалната директорка на IFAW Океанија, Ребека Кибл во изјавата.
Се смета дека илјадници коали биле меѓу домородните животни убиени во пожарите што ги зафатија источните и јужните држави на Австралија кон крајот на 2019 и почетокот на 2020 година.
Истражувањето минатата година во Нов Јужен Велс, најнаселената држава во Австралија, предупреди дека коалата би можела да исчезне до 2050 година.
