Покрај големиот број корисни својства што ги има оревот, во продолжение ќе зборуваме за неговите негативни особини.
Уште нашите далечни предци го сметале оревот за депресивно дрво и верувале дека повеќето самоубиства се случиле токму под него. Иако денес многумина би рекле дека таквото сознание се заснова на суеверие, современото истражување сепак укажува на одредени недостатоци на ова растение. За што се работи?
Оревот содржи хемикалија наречена хидројуглон, која од корените ја излачува во почвата. Овие хемикалии се наоѓаат и во лисјата и во другите делови на оревот – гранчиња, кора, цвет, лушпата на плодовите. Хемикалијата хидројуглон, кој инаку не е отровен, во контакт со кислород оксидира во високотоксичен југлон.
Чувствителните растенија што се одгледуваат во близина на оревите, поради тоа венеат, пожолтуваат или воопшто не напредуваат во растот, бидејќи југлонот ги спречува да ја добијат енергијата потребна за метаболичка активност.
Не треба да се засадува орев во близина на куќата. Освен што ја блокира светлината, оревот има исклучително силен корен што честопати може да го подигне бетонот околу или под куќата. Експертите советуваат дека оревите не треба да се садат во близина на паркинзите или куќата поради темелите. Имено, неговиот корен оди и до пет метри во длабочина.
Што да се сади, а што не под оревот?
Исто така, во близина на оревот, треба да одгледувате растенија кои не се чувствителни на југлон, односно да избегнувате сеење и садење на оние кои се чувствителни.
Зеленчук чувствителен на југлон: домати, пиперки, компири, модар патлиџан, зелка, аспарагус, краставица.
Цвеќиња: петунија, нарцис, хризантема, хортензија, лилјани, азалеја.
Дрвја: јаболко, круша, вишна, капина, боровинка, бел бор, црвен бор.
Растенија кои не се толку чувствителни се пченка, грав, кромид, репка, моркови, тиквички, винова лоза, праски, нектарини, цреши, сливи, јапонски јавор, невен и други.
Ако мора да одгледувате растенија во близина на орев, тогаш решението е во повисоките цветни леи. Важно е да се обезбеди добра дренажа и да се отстранат цветовите, лисјата и другите делови на оревот од цветните леи.
