30 годишниот јубилеј на фестивалот „Оро без граници“ , годинава се одбележува со низа активности, а ќе се заокружи со две финални вечери в четврток и во петок на 16 и 17 септември во Куршумли ан.
– Двете вечери ќе бидат изненадување за посетителите и љубителите на фолклорот – вели д-р Билјана Лалчевска Серафимовска, директорка на Детскиот културен центар – Карпош.
Фестивалот уште од самото формирање па сѐ до ден денеска, е со ревијален карактер. Оваа година со оглед на ограничувањата и мерките, нема да има дефиле на учесниците. За жал нема да се формира ни најголемото оро, оро кое не познава граници, оро кое е симбол на пријателство меѓу децата.
-Оваа година својот 30 годишен јубилеј, „Оро без граници“ го одбележува низ целата година со различни активности како што се ликовниот конкурс на тема Оро без граници – симбол на пријателство меѓу децата, изложба на фотографии на тема „Деца во традиционални носии минато – сегашност“, Ретроспективна фото галерија „Три децении Оро без граници“, проекција на интервју со основоположникот на Оро без граници Г-дин Тофе Дракулевски, промоција на каталог посветен на Оро без граници. Фестивалот ќе се заокружи со две фестивалски вечери на 16 и 17.09.2021 во Куршумли ан – изјави директорката на фестивалот.
Детскиот културен центар – Карпош со својот фолклорен ансамбл, со поддршка од Град Скопје, е домаќин на фестивалот „Оро без граници“, чија што традиција започнува од 1991 година по иницијатива на доајенот на македонскиот фолклор Тофе Дракулевски.
