Во моментов околу 450.000 луѓе се лекуваат од ковид-19 во светот, а бројката се зголемува. Лошата вест е дека не е сигурно дали еднаш заразената личност е отпорна на повторна зараза и токму тука е важен имунолошкиот систем.
Имунитетот е целосна заштита од болести, но работата е многу покомплицирана, според Центарот за контрола и превенција на болести. Вродениот имунитет е присутен уште од раѓање, стекнатиот имунитет е специфичен одговор на одделен антиген или група тесно поврзани антигени. Стекнатиот имунитет е поделен на активен и пасивен.
Разликата е во тоа колку добро телото е запознаено со вирусите и бактериите за кои ги развило антителата и колку може да ги спречи идните заболувања. Добрата вест е дека и двата облика на имунитет можат да одиграат голема улога во заштитата од коронавирусот.
Што е активен имунитет и како се стекнува?
Активниот имунитет се стекнува кога телото е изложено на болести, па тој го поттикнува имунолошкиот систем да произведува антитела на таа болест. Тоа може да се случи на два начина: или преку инфекција, значи по природен пат, или со вакцина.
Со вакцинирањето се создава имунитет сличен на оној по природно заболување, но без изложеност на болеста и нејзините компликации. Овој тип имунитет ќе му помогне на имунолошкиот систем да препознае одредени болести и да влијае врз производството на антитела потребни за да се одбрани организмот од болести. Активниот имунитет е долготрајна заштита, но зависи од конкретната болест.
Иако останува да се направат многу истражувања, д-р Џими Мејер, професор на Универзитетот Јејл, сигурен е дека и активниот и пасивниот имунитет можат да бидат заштита од коронавирусот.
Сепак, научниците во моментот го насочуваат целото внимание на проучување на стекнатиот имунитет кај луѓе што закрепнале од ковид-19.
Имунитет за повторена инфекција
Пред неколку недели на состанокот на Светската здравствена организација (СЗО), д-р Мајкл Рајан, директор на програмата за итни ситуации, сподели дека сè уште не е познато дали луѓето што закрепнале од инфекцијата можат повторно да бидат жртва на истиот вирус и каков вид имунитет е потребен за борба против вирусот.
– Очекувавме некоја личност да развие антитела и на тој начин да е заштитена подолг период. Сепак, не можеме ништо да тврдиме, бидејќи сè уште станува збор за нов, непознат вирус – заклучил тој.
Меѓутоа, некои експерти се согласуваат дека еднаш заразено лице, сепак развило некаков облик на заштита.
Ако овој вирус се однесува како и сите други, откако некое лице се зарази и закрепне, мора да стекне имунитет за да се заштити од повторна инфекција – смета д-р Ентони Фаучи, владин експерт за инфективни болести во Америка.
Што е пасивен имунитет
Пасивниот имунитет е заштита стекната со развојот на антитела на болеста преку сопствениот имунолошки систем. Оваа заштита е временски ограничена, обично на неколку недели или месеци. Преносот на антитела од мајка на дете преку плацентата е еден пример за стекнат имунитет.
Една од најголемите придобивки на пасивниот имунитет е тоа што веднаш обезбедува заштита, но не дејствува долго како активниот имунитет и губи на сила за неколку недели.
Сепак, и ова е корисна информација, бидејќи може да помогне кај коронавирусот.
– Со давање антитела од крвта на луѓето што закрепнале од заразата на луѓе што се болни или стари, се превенираат компликациите и се забрзува закрепнувањето – смета д-р Мајер и додава дека се потребни понатамошни истражувања.
