На многу жители на крајниот запад на Босна и Херцеговина, како и на делот на Карловачката жупанија што се граничи со Хрватска, добро им е позната гужвата на граничните премини во таа област. Дел од причината за метежот се лошите патишта, а од околината на Велика Кладуша доаѓа неверојатна приказна за млад човек кој по години игнорирање на властите решил сам да го поправи еден од овие патишта, пренесуваат босанските и хрватските портали.
15-годишното момче по име Енес од блиското село Јоховица решило да ги преземе работите во свои раце. Тој ги наполнил дупките на патот со песок што впива вода и со сопствени пари изнајмил машина за да го поправи патот, па сега изгледа речиси како асфалт, пренесуваат медиумите.
„Народот ми е благодарен што го одржувам патот, затоа што возат поскапи автомобили, па сега помалку ќе ги уништуваат на дупките“, вели Енес.
Енес има уште неколку интересни пораки за патниците кои ја преминуваат границата овде.
„Забележав некои луѓе кои доаѓаат од ЕУ како фрлаат ѓубре на страната од патот и тоа не е во ред. Да се грижиме за природата, бидејќи тоа е нашиот живот. Исто така, би сакал поединци да возат побавно за да не ме удрат среде патот. На сите им посакувам среќен пат и поздрав од Енес до сите од се срце“, вели овиј вреден тинејџер.
Како се случува 15-годишно момче да работи работа што треба да ја вршат комуналните служби, е прашање на кое треба да си одговорат само надлежните институции.
